Na slědach Krabata - Wutrobnje witajće do dwurěčneje Łužicy
Auf den Spuren des Krabat - Herzlich Willkommen in der zweisprachigen Lausitz

Wustawki towarstwa

Přijimowanska próstwa

Download přijimowanskeje próstwy, dale [PDF]

Towarstwowe wustawki

Preambla

Po nowych pućach kročić a při tym stare a wupruwowane šćežki a korjenje znowa wotkryć a wožiwjeć – to je naš wurazny zaměr. Wosebje te puće a šćežki, kotrež wobydlerjow našeje rjaneje kónčiny do wzajomnosće wjedu; puće na kotrychž naši přećeljo a hosćo nas namakaja. Do našeje překrasneje dwurěčneje Łužicy, do našich dwurěčnych gmejnow, k brjoham našich jězorow, do našeje rěče, do nałožkow a wašnjow a do našich wutrobow.

Pućik ma nam při tym naš „KRABAT“ być, kotryž na kuzłarske wašnje swój čas našich prjedownikow wozbožeše a kotryž móže nam dźensa z korjenjom być, kotryž da naš region rozkćěć.

§ 1 – Mjeno a sydło

(1)   Towarstwo ma mjeno: Na slědach krabata – towarstwo za regionalne wuwiće w dwurěčnej Łužicy (skrótka: KRABAT z.t.).

(2)   Towarstwo ma so do towarstwoweho registra zapisać a dóstanje tak připis “zapisane towarstwo” (z.t.).

(3)   Sydło towarstwa su 01920 Njebjelčicy.

§ 2 – Zaměr towarstwa

(1)   Zaměr towarstwa je spěchowanje wuměłstwa a kultury, kubłanja a zdźěłowanja, dorozumjenja ludow, domizniskeho zmyslenja a tradicionalnych wašnjow a nałožkow a to z(e):

  • podpěranjom zeznajomnjenja serbskich kulturnych kubłow a identifikaciskeho procesa z postawu KRABATa,
  • spěchowanjom dorozumjenja mjez ludami, wosebje dźiwajo na wuchodne rozpřestrěće Europskeje unije,
  • spěchowanjom serbskeje rěče a kontaktow k słowjanskim ludam,
  • podpěranjom trajneho regionalneho wuwićoweho procesa, wosebje ze splećenjom lokalnych, regionalnych a nadregionalnych akterow z wuměłstwa a kultury, kubłanja a wědomosće kaž tež hospodarstwa a zarjadnistwa,
  • nadregionalnym spěchowanjom zeznajomnjenja regionalnych wašnjow a nałožkow,
  • wutworjenjom a spěchowanjom regionalneho woznama KRABATa.

(2)   Towarstwo prócuje so nimo toho wo zhromadne dźěło z druhimi organizacijemi přez wuměnu informacijow a myslow, móžno tež přez zhromadne akcije a zarjadowanja.

§ 3 –Wšěmwužitnosć

(1)   Towarstwo ma jenož a bjezwuwzaćnje wšěmwužitne zaměry w zmysle „dawkozlěpšowanske zaměry“ porjada wotedawkow w wotpowědnym spisanju.

(2)   Towarstwo skutkuje njesebićnje; nima prěnjotnje swójskohospodarske zaměry.

(3)   Srědki towarstwa smědźa so jenož za zaměry wustawkow wužiwać. Čłonojo njedóstanu žane płaćenja ze srědkow towarstwa.

(4)   Žana wosoba njesmě měć z wudawkami, towarstwu cuzymi, abo z nadměrnym zapłaćenjom lěpšiny.

§ 4 – Wobchodne lěto

(1)   Wobchodne lěto je kalendarske lěto.

§ 5 – Čłonstwo

(1)   Čłon towarstwa móže być kóžda přirodna a kóžda juristiska wosoba priwatneho a zjawneho prawa. Přizjewjenje ma być pisomne. Wo přijimanju a wotpokazanju rozsudźi předsydstwo.

(2)   Za čestnych čłonow pomjenuja so čłonojo abo nječłonojo, kotřiž su sej dobyli wosebite zasłužby za towarstwo. Za to je trěbne wobzamknjenje sobustawskeje zhromadźizny. Čestni čłonojo njetrjebaja přinoški płaćić. Maja hewak samsne prawa kaž porjadni čłonojo.

(3)   Čłonstwo skónči so

  • ze smjerću čłona, pola juristiskich wosobow z jich rozpušćenjom;
  • z pisomnym wuprajenjom wustupa, kotrež so zapoda předsydstwu (tole je jenož móžne ke kóncej wobchodneho lěta z měsačnym wupowědźenskim časom);
  • z wuzamknjenjom z towarstwa, hdyž něchto zaměrnje přećiwo zajimam towarstwa jedna abo njehladajo napominanjow swoje přinoški njepłaći.

§ 6 – Prawa a winowatosće

(1)   Čłonojo maja prawo, so na wšěch zarjadowanjach towarstwa wobdźělić.

(2)   Maja nimo toho prawo, na předsydstwo a sobustawsku zhromadźiznu namjety zapodać.

(3)   Čłonojo maja wot sobustawskeje zhromadźizny wobzamknjene přinoški dypkołnje zapłaćić.

(4)   Kóžda přirodna a juristiska wosoba ma jedyn hłós.

§ 7 – Přinoški a dochody

(1)   Towarstwo žada přinoški. Wysokosć přinoškow je postajena w přinoškowym porjedźe, kotryž sobustawska zhromadźizna wobkrući.

(2)   Sobustawski přinošk ma so přeco spočatk wobchodneho lěta za přichodne płaćić.

(3)   Dary a druhe dodawki towarstwu wužiwaja so kaž přinoški po wustawkach.

§ 8 – Organy towarstwa

(1)   Organy towarstwa su

  • sobustawska zhromadźizna
  • předsydstwo

§ 9 – Sobustawska zhromadźizna

(1)   Sobustawska zhromadźizna je najwyši organ towarstwa.

(2)   Sobustawska zhromadźizna so znajmjeńša jónu wob lěto wot předsydstwa zwoła a to znajmjeńša dwě njedźeli do toho. Zwoła so pisomnje a z dnjowym porjadom. Sobustawsku zhromadźiznu nawjeduje předsyda abo jedyn z čłonow předsydstwa.

(3)   Sobustawka zhromadźizna je wobzamknjenjakmana, hdyž je znajmjeńša jedna třećina wšěch čłonow přitomna. Je-li wobzmknjenjanjekmana, dyrbi předsydstwo w běhu třioch njedźelow druhu zhromadźiznu ze samsnym dnjowym porjadom zwołać. Ta je njehladajo na ličbu přitomnych wobzamknjenjakmana.

(4)   Sobustawska zhromadźizna

  • rozsudźi wysokosć přinoškow
  • woli předsydstwo a pruwowarjow pokładnje
  • přijima rozprawu předsydstwa a finančnu rozprawu kaž tež rozprawu pruwowarjow pokładnje
  • rozsudźi wo wuswobodźenju předsydstwa a pruwowarjow pokładnje, wobzamknje hospodarski plan
  • rozsudźi doskónčne wotpokazanje sobustawskich próstwow a wo wuzamknjenju čłonow
  • wobzamknje změny wustawkow a rozsudźi wo rozpušćenju towarstwa.

§ 10 – Předsydstwo

(1)   Předsydstwo towarstwa ma znajmjeńša 7, najwjace 9 čłonow.

(2)   Předsydstwo so zestaja z

  • předsydy, knjez Reiner Deutschmann, rodźeny 29.06.1953, Kamjenc
  • zastupowaceho předsydy, knjez Tomaš Čornak, rodźeny 25.12.1963, Njebjelčicy
  • zapisowarja
  • pokładnika
  • nowinarskeho rěčnika
  • štyrjoch přisydnikow.

(3)   Předsydstwo so wot sobustawskeje zhromadźizny na dwě wobchodnej lěće wuzwoli a zastawa zastojnstwo hač do nowowólbow. Při dočasnym wupadźe čłona předsydstwa móže předsydstwo w běžnej wólbnej periodźe postajić narunanskeho čłona.

(4)   Předsydstwo rozsudźa z jednorej wjetšinu, při samsnej ličbje hłosow rozsudźi hłós předsydy.

(5)   Towarstwo zastupuje sudnisce a zwonkasudnisce předsyda, jeho zastupjer a pokładnik, přeco pak z dwěmaj wosobomaj zastupjene. Předsydstwo nawjeduje dźěło towarstwa a rjaduje towarstwowe zamóženje.

(6)   Za wužiwanje ležownosćow a za prawniske akcije, kotrež towarstwo wjace hač 3.000 € płaća, smě předsydstwo jenož z přihłosowanskim wobzamknjenjom wjetšiny sobustawskeje zhromadźizny jednać.

§ 11 – Protokole

(1)   Wo kóždej sobustawskej zhromadźiznje a posedźenju předsydstwa ma so pisać protokol. Wón ma so podpisać wot předsydy a zapisowarja.

(2)   Kóždy čłon ma prawo sej protokol wobhladać.

§ 12 – Přirada

Předsydstwo smě z přihłosowanjom sobustawskeje zhromadźizny zwołać přiradu.

§ 13 – Pruwowanje pokładnje

(1)   Na lětnej hłownej zhromadźiznje wuzwolitej so na dwě lěće dwaj pruwowarjej pokładnje, kotrajž njepřisłušetaj předsydstwu.

(2)   Pruwowarjej mataj nadawk, porjadne knihiwjednistwo a přetrjebu srědkow pruwować a zawěsćić jónu wob lěto wobstatk pokładnje zašłeho kalendarskeho lěta.

(3)   Pruwowarjej pokładnje mataj sobustawskej zhromadźiznje rozprawjeć wo resultaće přepruwowanja kasy.

§ 14 – Změna wustawkow, rozpušćenje towarstwa

(1)   Změna wustawkow a rozpušćenje towarstwa móže so jenož w sobustawskej zhromadźinje wobzamknyć.

(2)   Wustawki změnić móžeja jenož 2/3 přitomnych čłonow, rozpušćenje towarstwa trjeba 3/4 hłosow přitomnych čłonow.

(3)   Jelizo registrowe sudnistwo w jednanju wo zapisanju towarstwa abo finančny zarjad w jednanju wo přispomnjenju towarstwa jako wšěmwužitne w zmysle wotedawkow jednotliwe postajenja wustawkow za prawe nima, so předsydstwo społnozmócni z wotpowědnymi změnami njedostatki wotstronić.

(4)   Při rozpušćenju towarstwa připadnje zamóženje towarstwa po zarunanju zwostatnych winowatosćow wot sobustawskeje zhromadźizny pomjenowanej instituciji, kotraž ma je njeposrědnje a bjezwuwzaćnje wšěmwužitnym zaměram wotpowědnje wužiwać.

§ 15 – Městno sudnistwa /  městnosć spjelnjenja

Městno sudnistwa a městnosć spjelnjenja je sydło towarstwa.

§ 16 – Nabyće mocy

Wustawki nabywaja z wobzamknjenjom na załoženskej zhromadźiznje inklusiwnje tam činjenymi změnami dnja 19.03.2001 móc. Wustawki wobsahuja žměny wot 03.03.2003 kaž tež wot 28.11.2005.

 

 

Impressum und Datenschutz | Impresum a škit datow  
Partnerojo: