Na slědach Krabata - Wutrobnje witajće do dwurěčneje Łužicy
Auf den Spuren des Krabat - Herzlich Willkommen in der zweisprachigen Lausitz

Powědka wo Krabaće

Krabat, syn chudeju staršeju, běše nuzowany po prošenju chodźić. Dundajo po kraju so w ćěmnej nocy w lěsno - hatnej krajinje wokoło Wojerec zaběža. Po dołhim a wobćežnym puću docpě stary wódny młyn. Młynk měješe sobuželnosć z nim a přiwza jeho jako dwanateho wučomnika, zo by jemu młynske rjemjesło nawučił.

Bórze Krabat spózna, zo zamóže Čornochołmčanski młynk wjac, hač jenož pšeńcu mlěć. "Čorny młynk" běše zdobom kuzłarski mišter. Tajnje jeho Krabat při kuzłanju wobkedźbowaše a čitaše husto w zakazanej "Koraktor-knize", zo by wjac nawuknył, hač jich mišter wučeše. Lěto so miny a Krabat běše ze swojimi kuzłárskimi znajomosćemi wšěch towaršow přesćahnył.

Nětko pak časćišo wo tym rozmyslowaše, štož běchu młynscy powědali, zo do kónca lěta stajnje jedyn z nich bědnje zahinje. Krabatej bu wědomje, zo jemu hrozy smjerć. Rady by wućeknył swojemu wosudej, tola derje wědźeše, zo ma mišter móc jeho zadźeržeć. Nětko móžeše jenož hišće lesć pomhać!

Krabat spózna, zo je jenički škit před mocu kuzłarja - maćerna lubosć, přetož ju kuzłar přewinyć njemóže. Poprosy mištra, zo by jeho na dźeń domoj pušćíł, zo móhł staršeju wopytać. 

Spěšnje poda so Krabat domoj a powědaše staršimaj do kajkich paslow bě sej zalězł. Nětko jimaj rozłoži, zo ma so mać podać do kuzłarskeho młyna a sej tam wot młynka wuprosyć swojeho syna. 

Na to nastaji so mać na puć do "Čorneho młyna". Tam dožiwi, kak kuzłarski mišter wšitkich wučomnikow do čornych hawronow zakuzła. Mjez nimi dyrbješe nětko swojeho syna spóznać a jeho z tym z namocy wuswobodźić.

W ćmowej komorce sedźachu dwanaće čornych ptakow na žerdce. Mać spózna syna na wotrěčenym znamju - Krabat skubaše so pod lěwym křidłom -jeho sej wot "Čornerho młynka" žadaše, a z tym wumóži!

Pozdźišo pytny młynski mišter, zo bě Krabat jeho kuzłarsku knihu, koraktor, skradźu sobu wzał. W swojej domiznje bu Krabat jako dobry kuzłar a pomocliwy kubler, jara znaty. Po wjele dyrdomdejstwach staji so ke kónčnemu bojej "Čornemu młynkej" a doby nad nim.

rysowanka: Měrćin Nowak-Njechorński/ Serbski muzej Budyšin

Impressum und Datenschutz | Impresum a škit datow  
Partnerojo: