Na slědach Krabata - Wutrobnje witajće do dwurěčneje Łužicy
Auf den Spuren des Krabat - Herzlich Willkommen in der zweisprachigen Lausitz

publikacije - 8. KRABATOWY SWJEDŹEŃ

Serbske Nowiny (póndźela, 13.07.2009)

4 500 ludźi młodźinski festiwal a Krabatowy swjedźeń w Njebjelčicach wopytało

Skupiny ze šěsć krajow witali

"2. młodźinski festwal a 8. Krabatowy swjedźeń je so wulce poradźił, swjećachmy kaž wulka swójba", zwurazni wčera na zakónčenju wjerška Njebjelčanski wjesnanosta Tomaš Čornak (CDU). Najwšelakoriše zarjadowanja w běhu třioch dnjow bě něhdźe
4 500 młodych a staršich ludźi zbliska a daloka wopytało, Wosebje młodźina steješe w srjedźišću swjedźenja. Čłonojo Serbskopazličanskeho, Pěskečanskeho, Miłočanskeho a Njebjelčanskeho młodźinskeho kluba běchu hromadźe z druhimi gmejnskimi towarstwami na přihotach a přewjedźenju zarjadowanja wobdźěleni. Witali su w Njebjelčicach 70 hosći z pólskeho Namysłowa, z čěskeho Hlučina a Frýdlanta, z madźerskeho Ladánybene, z Moskwy, z francoskeho Toula kaž tež rockowu skupinu z Danskeje. Mnozy z nich programy sobu wuhotowachu.

Afriski temperament a serbska hudźba

Njebjelčicy (aha/SN/mwe). Po dopołdnišich kemšach, na kotrychž zaklinčachu tež cuze zynki a po rańšim piwku, zetkachu su Njebjelčenjo a mnozy hosćo popołdnju k zhromadnosći na spodobnje wuhotowanym swjedźenišću. Při rjanym słónčnym wjedrje wosebje swójby z přiwuznymi a znatymi swačachu, někotryžkuli wuži tež přiležnosć, zo by sej wšelake rjemjesłowe wudźěłki w nastajenych budkach kupił. W stanje běchu słyšeć bubony, přetož na spočatku bě bubnarska skupina z francoskeho Toula na rjedźe. Tam drje młodźi ludźo bydla, swoje korjenje pak maja w zapadnej Africe. Tuž knježeše w programje eksotiski "čorny temperament". Nimo bića na bubony wuměłcy spěwachu a samo rejwachu. Přijěł bě z tutej skupinu do Łužicy Claude Tovenot, kotryž wudźeržuje z Njebjelčicami hižo lěta partnerske zwiski. "Po ćežkej chorosći sym po někotrych lětach rady zaso přijěł, čuju so tu kaž doma", wón rjekny. Powitał je swjedźenarjow na program w serbskej a němskej rěči wjesnanosta Tomaš Čornak. Dwurěčnu moderaciju programa měješe Milenka Rječcyna. Wona skrótka kóždy blok předstaji. Po afriskich zynkach běchu rejwarjo z Kamjenca na rjedźe. Kamenz can Dance skupina dźěći a młodostnych rěka. Tute ćěleso běchu jako projekt Kamjenskeho kulturneho zawoda załožili. W rukomaj měješe to tehdyši nawoda zarjadnišća Reiner Deutschmann, předsyda Krabatoweho towarstwa. Wčera přitomny wón publikumej projekt a rejwarjow skrótka předstaji. Pokazali su woni wurězk swojeho něhdźe połdrahodźinskeho cyłkowneho programa. Po nim běchu žonglerojo z Drježdźan na rjedźe a wo prawu serbsku naladu postara so skupina Wusmuž. "Wjeselimy so, zo smy přeco zaso něhdźe druhdźe. W Njebjelčicach hišće byli njejsmy", praji spěwar a pianist Marko Njek.

Beneficny koncert za zbrašenych

We wobłuku 8. Krabatoweho swjedźenja - třeći króć běchu Njebjelčicy wuhotowar mjeztym přiwabliweho podawka - překwapichu organizatorojo z chwalby-hódnej wobsahowej nowostku. Předsyda Krabatoweho towarstwa Reiner Deutschmann je sobotu popołdnju tež serbsce něhdźe 250 zastupjerjow z 18 domow za zbrašenych z cyłeje Sakskeje na beneficny koncert witał. Hódnoćejo dźěło Krabatoweho towarstwa wón wuzběhny, "zo je zaměr dźěławosće, skrućeć zhromadnosć wšěch we Krabatowam regionje bydlacych a zo ma so zbrašenym wotpowědna kedźbnosć wěnować". Nowe na lětušim Krabatowym swjedźenju tež bě, zo so sylnje na zajimy młodźiny dźiwaše. Na beneficny koncert witaše wjesnanosta Njebjelčanskeje gmejny Tomaš Čornak tež zastupjerjow z parnerskich městow z Čěskeje, Pólskeje a Madźerskeje. Milenka Rječcyna po swojim zwučenym šarmantnym wašnju beneficny koncert moderěrowaše a zbrašenym pedagogisce wušiknje instrumenty rozjasni. Z Njebjelčic pochadźaca hostakec trójka - sotry Marhata Korjeńkowa, Marja Šimanowa a Bernadet Cyžec - zahajichu z "Chcył měć hólčik rjanu holčku" pisany, wotměnjawy program. Wosom młodostnych wobdźělnikow 2. młodźinskeho festiwala, kotřiž běchu so na dźěłarničce bubnarjow wobdźělili, so tohorunja předstajichu, skedźbnjejo na dobru zhromadnosć serbskich, němskich, čěskich a pólskich młodostnych. Tež Krabat a Čorny młynk pokazaštaj swoju zwjazanosć z młodymi ludźimi. Mjeztym zo Krabat měnješe, "zo je sej dlěje hač 300 lět wobchwał swoju młodisć tohodla, dokelž je so mjez młodźinu stajnje derje čuł", powědaše Čorny młynk wo zbrašenym młodostnym z Čorneho Chołmca. Tutón Henry Flaks njeje ženje šulu wopytał. Přiwšěm zamóže wón retorisce wuběrnje słyšane bajki zasopowědać. Šěsć z nich je na CDji nahrawanych, kotruž Čorny młynk předawaše. Z wunoška tuteje akcije ma so trěbna delfinowa terapija zbrašenemu młodostnemu sobu zapłaćić. 

 

Krabatowy pokal do Wotrowa

Na 2. mjezynarodnym młodźinskim festwalu w Njebjelčicach, zwjazanym z Krabatowym swjedźenjom, je wosom dorostowych koparskich mustwow wo Krabatowy pokal wojowało. Kónčny staw bě slědowacy: Prěni buchu Wotrowscy koparjo, kotřiž su so přećiwo Worklecam přesadźili. Na 3. městnje běchu domjacy hrajerjo prěnjeho Njebjelčanskeho mustwa a 4. městno wobsadźi Wěteńca. 5. městno docpěchu koparjo ze Serbskich Pazlic, kotřiž běchu Pěskečanow porazyli. Předposlednje, potajkim 7. městno mějachu Njebjelčicy II, přewinywši Brěznju. Tuta bě jenička, kotraž njeje na turněru žane wrota docpěła. 

 

Překwapjace wuslědki pjeć dźěłarničkow mjezynarodneho młodźinskeho festiwala

Kreatiwny potencial wotkryli

Njebjelčicy. Wuslědki swojeho dźěła w pjeć dźěłarničkach su wobdźělnicy sobotu popołdnju zjawnosći předstaijli. Na najwšelakoriše wašnje so pokaza, kelko kreatiwneho potenciala w młodostnych tči, kak rozdźělnje woni na swój swět zhladuja a kak jón runje tak rozdźělnje zwobraznjeja. Štož je zašłe dny na rysowankach, mólbach, fotografijach sćěnowinach atd. nastało, je wobhladanjahódne. Často dźě su wobdźělnicy dźěłarníčkow motiwy z Njebjelčic a wokoliny zapopadnyli.

Ze Skalu so zeznajomili

Łazowski žurnalist Andreas Kirschke bě za medijowu dźěłarničku, kotraž so ze žiwjenjom a skutkowanjom Jana Skale zaběraše, wulkotnu koncepciju zdźěłał. Produkt tutoho dźěła wón na štyrjoch sćěnowinach sobotu we wustjeńcy předstaij. Pólscy, čěscy a serbscy wobdźělnicy běchu mjez druhim w Budyskim Serbskim instituće za materialom slědźili. W redakciji Serbskich Nowin zhonichu wo tym, kak bě Skala jako publicist a nowinar skutkował. W rozmołwje z jeho wnučkom dr. Peterom Krohom wuslědźichu swójbne poćahi, kotrež su lědma znate. Poslednja sćěnowina skedźbnja na projekt přichoda - nastawacy Dom Jana Skale w Njebjelčicach. Rozmołwa z wjesnanostu Tomašom Čornakom a měnjenja wjesnanostow su pokazka na to, kotru hódnotu projekt ma.  MiR

Nasćěnowy wobraz nastał

Wjele wuměłskeho talenta pokazachu młodostni, kotřiž wodźělichu so pod nawodom Kerstin Roscher na molowanskej dźěłarničce. Jich wuslědki njeběchu kónc tydźenja jenož we wustajeńcy widźeć, ale na wulkej sćěnje młodźinskeho kluba kaž tež při Miłočanskej skale, hdźež su tójšto kamjenjow pomolowali. Runje tam so zadani sej kreatiwne wudźěłki młodostnych wobhladać, přetož skała je po słowach Kerstin Roscher nětko wo wjele pisaniša. To je runje tak trajny wuslědk dźěłarnički kaž nasćěnowy wobraz při młodźinskim klubje. Na nim móžeš sej mjez druhim stilizowanu Njebjelčansku cyrkej wobhladać. Při swojich zaběrach wužiwachu młodostni jara rozdźělne techniki. Tak nastachu akwarele runje tak kaž rysowanki z wołojnikom abo tušu.   MWj

Z kamjenjom a drjewom

Markus Herold, student na Drježdźanskej wuměłstwowej wysokej šuli, nawjedowaše rězbarsku dźěłarničku. Jemu poboku bě Gabriel Čornak. Dźewjeć młodostnych bě so na kreatiwnym dźěle wobdźěliło. Rězbarili su hólcy a holcy w starobje 15 do 18 lět w Miłočanskej skale. Spočatnje bě nawoda wobdźělnikam zawod do tutoho wuměłstwa podał. Wšako bě to za wšěch něšto nowe. Z kajkim zapalom su ći, kotřiž so za tutu dźěłarničku rozsudźichu, skulptury z drjewa a kamjenja zhotowili, je woprawdźe wobdźiwanja hódne. Po tydźenju wulkeje prócy su rězbarjene čwory, drjewjana ławka a kwětkowcy pola gmejnskeho zarjada wustajene, kamjentne skulptury pak w Miłoćicach. Młodostni su tójšto nawuknyli a při rězbarjenju tež mjezynarodne zwiski nawjazali.   mwe 

Rozdźěle mjez městom a wsu znazornili

Pod nawodom swobodneho fotografa Matthiasa Schumanna zaběrachu so młodostni z Čěskeje, Ruskeje a Madźerskeje z rozdźělemi mjez žiwjenjom we wulkim měsće a małej wsu. Tak pobychu woni w Drježdźanach a Lipsku a zapopadnychu wšelake architekturne stile, ludźi při wšědnych činitosćach a nadróžne žiwjenje. To samsne činjachu woni w Njebjelčicach a Miłoćicach. Při wustajeńcy stajachu fota z města a wsy pornosebi. Wuslědk je fotografiski kaleidoskop, skićacy wobhladarjej dohlad do wobeju žiwjenskeju formow, bjeztoho zo by jednu z wobeju faworizował. Často je mały žortny podzynk pytnyć, kotryž wubudźa při wobhladanju fotow posměwk. To drje swědči wo tym, kelko wjesela młodostni při fotografowanju mějachu.   MWj

Bubnarić nawuknyli

W běhu dweju dnjow nawuknychu młodźi ludźo z Pólskeje, Čěskeje, Madźerskeje a Němskeje na bubonach hrać. Byrnjež samsnu rěč njenałožowali, jich instrumenty a rytmus do cyłka wjazachu. Na kóncu tworjachu bubnarjo zhromadnosć, wo kotrejž móžachu so hosćo sobotu popołdnju na beneficnym koncerće přeswědčić. Tam mjenujcy pokazachu, što běchu nawuknyli. Spokojom a wjesołaj běštaj nawodaj, zo je so dźěłarnička poradźiła a zo měještaj tajkich muzikalnych wobdźělnikow. Jakub Čornak z Njebjelčic a Johannes Kruscha z Wojerec tutu dźěłarničku nawjedowaštaj. Wobaj staj hudźbnikaj a wobstaraštaj tež bubony. K wotběhej zarjadowanja słušeše tohorunja rytmiske kleskanje. Wotměła je so dźěłarnička na swjedźenišću, tak zo móžachu samo wobydlerjo w susodstwje mjezynarodny młodźinski temperament sobu dožiwić.   mwe

 

 

Wuslědki dźěłarnički w Miłoćicach přepodali

Skulptury pyša nětko nawjes

Miłoćicy (aha/SN). Wot Nebjelčanskeje gmejny planowane nahladne wuhotowanje nawsy w Miłoćicach su wčera dopołdnja z prěnim krokom zahajili. Mjez pjeć dźěłarničkami 2. młodźinskeho festiwala w Njebjelčicach bě jedna, kotraž zaběraše so z kreatiwnym wobdźěłanjom drjewa a zornowca. Tutón workshop nawjedowaše 27lětny Budestečan Markus Herold. Wón studuje pjate lěto wuměłstwo na akademiji w Drježdźanach. Jemu poboku bě Njebjelčan Gabriel Čornak. Wobaj staraštaj so zašły tydźeń wo młodostnych z Čěskeje, Pólskeje, Madźerskeje kaž tež z Łužicy a podpěrowaštaj jich při wobdźěłanju matrialijow, kotrež mějachu wot wutory k dispoziciji. Štyri dny młodostni, najmłódši bě hakle 14 lět, z wulkej energiju při Miłočanskej skale dźěłachu. Štyri nastate skulptury, dwě ze zornowca, na temu "Zahroda w krajinje" nětko nawjes w Miłoćicach pyša. Karin Vitastová z čěskeho Hlučina - zamołwita tam za pomnikoškit - bě na skulpturje z drjewa dźěłała. Wona měnješe, zo "bě to přewšo dobra ideja, ze swojim dźěłom serbsku wjes porjeńšić a při dźěle serbskich młodostnych zeznać". Jedyn ze zornowcoweju stołpw staj Markus Herold a Gabriel Čornak wobdźěłałoj. Wčera při wotkryću zanjeseštaj Anna Zienkiewicz z pólskeho Namysłowa a Otokar Výšek z čěskeho Frýdlanta tež serbsku pěseń. Na tekst Jana Skale bě Výšek zašły tydźeń spontanje melodiju spisał. Njebjelčanski wjesnanosta Tomaš Čornak skedźbni "na identifikaciju mjez skału a Miłoćicami". Mjez wobdźělenymi Miłočanami bě Alojs Hrjehor, kotryž so wo wupyšenju nawsy takle wupraji: "Wjele nimojěducych je zhoniło, zo su tu młodostni z wjacorych krajow dźěłali. Tak stawa so naša wjes tež za mjezami kraja znata."

Impressum und Datenschutz | Impresum a škit datow  
Partnerojo: